Conceyu Abiertu

 Asoleyá'l programa ellectoral de CUPX

I.- POR UN AYUNTAMIENTU MAS DEMOCRATICU Y PARTICIPATIVU.

• Reivindicamos una democracia participativa que permita a los ciudadanos y ciudadanes decidir que modelu políticu y social quieren pa Xixón y Asturies, nel exerciciu de la so soberanía popular.

• Vamos potenciar les asociaciones de vecinos y les asamblees populares nos barrios, articulando mecanismos pa que controlen materies d'urbanismu, vivienda, mediu ambiente, cultura y servicios sociales ente otres, al traviés d'un cambéu en fondura del Reglamentu de Participación Ciudadana y del Reglamentu d'Organización y Funcionamientu del Ayuntamientu de Xixón, qu'amplíe les posibilidaes de propuesta, control y participación nos plenos y comisiones de les asociaciones vecinales y d'otru tipu.

• Vamos ellaborar una normativa que permita la Iniciativa Vecinal nes materies lexislatives de competencia del Ayuntamientu asina como la posibilidá de promover el referéndum venceyante, facilitando la participación ciudadana individual y coleutiva. Esixendo un  1% y 3% de los censaos nel conceyu pa caúna respeutivamente.

II.- CONTRA EL CACIQUISMU, EL CLIENTELISMU Y EL NEPOTISMU NA ALMINISTRACIÓN PÚBLICA Y POR UNA LLUCHA DECIDIDA CONTRA LA  CORRUPCIÓN.

• Vamos crear un Reglamentu del Estatutu del Conceyal/a que:
  
  - Torgue'l tresfuguismu y permita un control de los sos bienes y riqueces, pa torgar el tráficu d'influencies, asina como establecer una serie d'incompatibilidaes que torgue'l amiguismu y l'enchufismu mientres exercen el cargu y el premiu una vegada abandonen ésti.
  - Llinde los mandatos a non más de dos años consecutivos y pa los cargos de llibre designación política remunerados non más allá de 8 años consecutivos. Coles mesmes la remuneración nun van poder superar una cantidá global mensual superior a 2.5 vegaes el Salariu Mínimu Interprofesional vixente en cada momentu.
  - Promueva la imposibilidá de presentase nuna llista eleutoral pa los imputaos en casos de corrupción.

• Vamos camudar la política llaboral nel Ayuntamientu, nes Fundaciones y Patronatos, asina como nes empreses municipales, evitando actitúes antidemocrátiques, antisindicales y represives.

• Vamos amenorgar el númberu de cargos de llibre designación afaciendo los cargos executivos y directivos a los puramente necesarios, yá que creemos que'l Ayuntamientu, los sos organismos autónomos y empreses tán enchíos d'altos cargos.
•  Vamos velar pol escrupulosu cumplimientu de los mecanismos llegales dientro de l'alministración tanto na so relación colos/es emplegaos/es públicos/ques como colos/es ciudadanos/es.

• Vamos articular mecanismos d'ufierta pública d'empléu qu'eviten les corrupteles, l'enchufismu, la subcontratación y el prestamismu llaboral.

•  Vamos implantar mecanismos dependientes d'organismos esternos que permitan la denuncia de conductes y casos de corrupción, con protección pa los denunciantes. Ye precisu facilitar la collaboración de los emplegaos públicos na deteición de comportamientos irregulares na Alministración, ensin medrana a represalies de nengún tipu, especialmente les que puedan condicionar la carrera profesional del denunciante.

•  Prohibición absoluta de la percepción de regalos, agasayadures o favores de cualquier natura, nin entá los que puedan considerase dientro del usu social o de cortesía, por parte de los emplegaos públicos nel desempeñu del so trabayu.

III.- POR UN XIXÓN DE MUYERES Y HOMES IGUALES

• Vamos lluchar por desaniciar toa desigualdá llaboral o salarial, tanto n'el mesmu Ayuntamientu como nes empreses municipales y privaes que se rellacionen con él.

• Vamos desendolcar l'aplicación de la Llei de Dependencia y vamos lluchar contra los sos retayos. Vamos poner en funcionamientu y vamos ameyorar los servicios municipales nel Sector de los Cuidos, que recayen sobre la muyer, p'amenorgar la so sobresplotación desaniciando los dobles y triples xornaes llaborales regalaes al capitalismu.

• Nos sectores educativos dependientes del Ayuntamientu:
  
  - Vamos lluchar decididamente contra'l machismu y por un cambéu na heteronormatividá a favor de la diversidá sexual.
  - Vamos desendolcar planes pedagóxicos pa poder prevenir a tiempu la reproducción de los roles y de la violencia nes xeneraciones futures.
  - Vamos poner en funcionamientu sistemes claros d'información sobre los distintos sistemes d'interrupción d'embaranzu y una educación afeutiva sexual que llegue a les y los mozos y que tamién les prepare y prevenga de manera efeutiva sobre los embaranzos non deseyaos y les enfermedaes de tresmisión sexual.

• Vamos atender  la violencia de xéneru cola llucha ciudadana contra la mesma,  yá que la violencia machista nun ye una cuestión privada del ámbitu domésticu. Los servicios municipales tienen de tar preparaos pa combatila dende'l desendolcu de midíes pa la prevención y protección de les muyeres amenaciaes.
  
•  Vamos crear una guardería llaboral pa los fíos y fíes de los y les trabayadores municipales.
  
• Vamos lluchar de manera activa contra'l proxenetismu y les redes d'esplotación sexual. Nun ye tolerable que muyeres sían esplotaes sexualmente na nuesa ciudá mientres la clase política, la Policía y la Judicatura asonsañen nun mirar. Dende'l Ayuntamientu vamos facer un trabayu de denuncia pública d'esta lacra y de protección a les sos víctimes.
  
• Vamos emprestar atención especial a la situación d'accesu al trabayu de les muyeres en cada plan económicu municipal. La planificación económica tien de contemplar l'impactu en razón de xéneru de les polítiques públiques d'empléu pa garantizar l'igual accesu al trabayu de les muyeres.
• Vamos potenciar actividaes empobinaes a homes col propósitu de sensibilizar y formar na cultura de la igualdá. Si los homes propónense corresponsabilizarse nes xeres doméstiques, nel cuidu de los fíos y de los familiares dependientes; si deciden tratar igual a los sos compañeros de trabayu qu'a les sos compañeres; si dexen de pensar en diferencies y empiecen a creer na igualdá, una parte bien importante del camín va tar fecha.

IV.- APOSTAMOS POR UNA ECONOMÍA SOCIAL Y ECOLÓXICAMENTE CALTENIBLE AL SERVICIU DE LA INMENSA MAYORÍA DE LA CIUDADANÍA Y NON DE LES OLIGARQUIES DEL CAPITAL.

• Vamos caltener una política agresiva y frontal contra la idea de convertinos en productores y esportadores d'enerxía. Non al "ciclu combináu" y a la regasificadora.
  
•  Refugamos la instalación de la Incineradora en GOGERSA, creando una planta de recicláu p'amenorgar los sos efeutos.
  
• Vamos sofitar a estazón a los seutores del Naval, la siderurxa, y polo xeneral tou lo referente a la industria, yá que creemos que Xixón tien de siguir siendo una ciudá eminentemente industrial. L'Ayuntamientu tien de tar a la cabeza de les movilizaciones pola defensa de la nuesa industria apostando por un cambéu progresivu haza modelos menos contaminantes.
  
• Vamos destinar el 10% de les cais pa la circulación esclusiva de bicicletes pa consiguir una ciudá menos contaminada, más saludable y que consuma menos enerxía ensin más gastu que'l necesariu pa la señalización.
  
• Vamos meyorar y ampliar el serviciu de Xixón- bici asitiando más puntos y ampliando l'horariu.
  
• Vamos empecipiar la negociación coleutivo y democrático del Plan Estratéxicu de Xixón, al traviés de xuntes de barriu y alcuentros colos axentes sociales, faciendo parte a tola ciudadanía de la programación económica y poder conocer asina, les demandes y necesidaes de les persones.
• Vamos crear empléu dignu y estable na nuesa ciudá, cola potenciación d'un nuevu texíu productivu diversificáu, algamando la participación municipal nes decisiones de les empreses estatales qu'especialmente afecten a Xixón.
  
• Vamos crear un Foru Económicu con participación de sindicatos, seutores de representación empresarial y estructures vecinales y sociales.
• Vamos establecer un Plan de sofitu al cooperativismu, SALs y empreses d'economía social. Con un plan de cesión de suelu y facilidaes financieres, vamos dar impulsu a les iniciatives económiques socialmente responsables que, amás de crear beneficios económicos, incidan positivamente nel desendolcu humanu.
  
• Vamos sofitar a la pequena empresa y autónomos, amenorgando la presión fiscal municipal, asina como los trámites burocráticos.
  
• Reaprovecharemos el texíu industrial abandonáu pa empecipiar la reindustrialización de Xixón.

V. POR UN SEUTOR PÚBLICU MUNICIPAL, QUE PONGA FIN A LES PRIVATIZACIONES Y REVIERTA LES YÁ REALIZAES, QUE TENGA COMO EXE L'IMPULSU D'UN MODELU DE RELLACIONES LLABORALES BASÁU NEL EMPLÉU ESTABLE Y CON DERECHOS.

• Vamos condicionar la rellación económica del Ayuntamientu con empreses a qu'éstes cunten con empléu estable y respeten les condiciones llaborales de los y les trabayadores. Nun vamos subvencionar les formes precaries de contratación y vamos torgar que'l Ayuntamientu trabaye con empreses que tengan altos índices de siniestralidá llaboral y de denuncies en maxistratura.
  
•  Vamos desaniciar la contratación d'Empreses de Trabayu Temporal (ETT's) o Empreses de servicios pa la realización de cualquier actividá que dependa direuta o indireutamente del Ayuntamientu.
  
• Vamos tener en cuenta a la hora de la contratación pa cualquier seutor dependiente del Ayuntamientu, direuta o indireutamente, los criterios de necesidá social, permitiendo con ello l'accesu al empléu de les persones más precisaes, ensin que con ello se vean menguaos los principios de meritos y capacidá.
  
• Vamos desendolcar l'aplicación práutica de la xornada de 35 hores nel ámbitu municipal y dependiente, asina como condicionar la contratación del Ayuntamientu con empreses privaes a que s'aplique efeutivamente la xornada de 35 hores.
  
• Queremos un conveniu únicu pa toos/es los/les trabayadores municipales, incluyíes empreses municipales, mistes, fundaciones y patronatu qu'oldee les condiciones llaborales pero vamos respetar los ámbitos de negociación particulares colos lexítimos representantes en cada casu, pal desendolcu de les especificidaes de cada sector.
  
• Vamos crear una Empresa Municipal de Servicios y Formación, sobre la base de l'actual Emulsa, qu'absuerba la mayoría de los servicios que demanda'l nuesu Conceyu, baxu criterios de rentabilidá social y non privada. En dicha empresa s'absorberíen les xeres de los actuales Planes d'Empléu Locales, Serviciu de Serenos, Comedores Escolares, Sofitu a Casa, Atención a la Dependencia, y demás servicios educativos y sociales anguaño en manos privaes, sustituyendo empléu precariu por empléu estable, y pa la contratación van tenese en cuenta tamién criterios de necesidá social, y van dise absuerbiendo les ufiertes públiques de formación profesional municipal.
  
• Vamos ellaborar un plan pal saneamientu y potenciación de EMTUSA, a aldericar colos/les representantes sindicales de la mesma y col movimientu vecinal, que garantice:
  
  - El so calter públicu. Terminando cola política de privatizaciones tapaes del tresporte municipal que se vienen faciendo al traviés del Consorciu de Tresportes d'Asturies y del ALSA
  - L'abaratamientu de los precios Medios del billete
  - Ameyorar la planificación de llínees
  - Potenciación y aumentu de los servicios nocherniegos
  - Intensificación de l'adecuación pa los/es minusválidos/ee
  - Puesta en marcha de convenios, subvenciones o midíes fiscales que favorezan l'usu del autobús pa dir al trabayu, a los centros sanitarios, deportivos, d'estudiu etc ...
  - Meyora de los horarios de les llínees qu'aumente la periodicidá permitiendo que nes principales llínees garantícese qu'esista un autobús a lo menos cada 10 minutos y que en llínees secundaries auméntense los anguaño esistentes, torgando qu'esistan parroquies rurales onde nun hai llínea regular o onde la esistente llindase a una o dos al día.
  - Equiparación del preciu de los billetes pa trayeutos especiales (conciertos, acontecimientos deportivos, Molinón, Búho, etc…) colos ordinarios.
  - Sistema de precios proporcionales, que faiga que'l billete sía gratuitu pa los/es ciudadanos/es con menos ingresos (que como media de la unidá de convivencia gane menos del SMI)
  - Una flota d'autobuses más respetuosos col mediu ambiente

• Vamos reestructurar en fondura la Empresa Municipal de Vivienda, convirtiéndola na xestora de tola vivienda social del conceyu y nun axente inmobiliariu pa la construcción, que sirva de sofitu tamién a les cooperatives y agrupaciones vecinales de construcción.
  
• Vamos caltener y ampliar  les actuales ayudes a la emancipación.
  
• Vamos sofitar  iniciatives de vivienda compartida pa mozos recién emancipaos.
  
• Vamos establecer reserves de suelu pa vivienda protexida con tases del 50% de suelu urbanizable.
  
• Creación d'un Parque de Viviendes Municipales d'Arriendu.
  
• Erradicación del chabolismu y la infravivienda.
  
• Fomentu del cooperativismu real na construcción de viviendes, lluchando contra'l negociu d'arriquecimientu baxu la cobertoria d'un falsu cooperativismu.
  
• Potenciar la rede telemática de la ciudá ampliando la zona wifi a tolos puntos de la ciudá.
  
• Realización d'un mapa educativu de la ciudá analizando les necesidaes de recursos xunto cola comunidá escolar, emprestando especial atención a la creación d'Escueles Infantiles  de 0-3 años que doten de places abondes a la ciudá
  
• Sofitu y creación de nuevos recursos públicos pa la población discapacitada que favoreza la so normalización y ocupación, potenciando los Centros Especiales d'Empléu.
  
• Ampliación del númberu de places de la cocina económica y xestión pública del albergue del transeúnte modificando la so actual condición y normativa, dexando convertilo nun recursu qu'encete cuestiones de reinserción más allá de lo puramente paliativu.
  
• Realización d'un mapa sanitariu que permita determinar los recursos médicos necesarios tanto n'atención primaria como especializada. Potenciación de la creación de recursos d'atención psiquiátrica en terapies grupales y de reconstrucción personal.
  
• Plan Integral pal desendolcu d'una formación profesional acorde a les necesidaes de Xixón, qu'evite l'espilfarru, la duplicación de servicios y l'especulación.

VI.- DEFENSA DE LA CULTURA Y LLINGUA NACIONALES D'ASTURIES, EMPEZANDO POLA OFICIALIDÁ D'ESTA ÚLTIMA, COMO FORMA DE DEFENDER TAMBIEN LA NUESA DIGNIDÁ COMO PUEBLU.

• Vamos poner en práutica de manera inmediata la cooficialidá de la Llingua Asturiana.
  - plantegando que toles publicaciones vaigan en Castellanu y Asturianu conxugando artículos nes dos llingües n'igualdá de condiciones; emplazando a los representantes municipales a facelo tamién nes sos intervenciones públiques.
  - Los ellementos d'imaxe y les rotulaciones de toles dependencies, locales, empreses, centros municipales culturales o deportivos, etc., van facese n'asturianu.

• Vamos desendolcar una política de fomentu y usu de la Llingua Asturiana na Enseñanza, Centros Municipales, Museos, Biblioteques, instalaciones deportives, etc.

• Vamos desendolcar y aplicar de manera real la toponimia asturiana nel Conceyu ensin demoranza.

• Vamos alfabetizar al personal municipal, en primer llugar nos puestos d'atención al públicu.

• Vamos desendolcar campañes per seutor -hostelería, comercio alimentación, pescaderíes, talleres...-, con nomes de les coses y productos n'Asturianu, al traviés de cartelos, cartes, llistes d'alimentos, etc.

• Vamos desendolcar campañes d'alfabetización pa la ciudadanía dende les AA. VV., UP, etc., poniendo a disposición de quienes lo riquieren los educadores precisos.

• Vamos fomentar la creación artística moza n'asturianu, entamando certames d'ámbitu xixonés y asturianu, tanto lliterarios, como musicales, vídeos, etc., en llingua asturiana.

• Vamos defender el patrimoniu popular asturianu tantu artísticu, como cultural, arquitectónicu, hestóricu y oral, al traviés de la ellaboración de planes concretos.

• Vamos ameyorar y ampliar la rede actual d'espacios culturales na ciudá, poniendo los edificios públicos baxu control públicu en collaboración col movimientu social y vecinal.

•  Vamos lliberar dalgún espaciu desocupáu pa les actividaes socioculturales del movimientu autoxestionariu.

•  Vamos desendolcar una política cultural popular y pegada a la cai que fomente la creación y la formación artística coleutiva ya individual y que tenga en cuenta a los y les creadores/es llocales.

• El Teatru Xovellanos como centru de programación de les artes escéniques de la ciudá tendrá de ponese baxu xestión puramente pública y vamos crear un centru dramáticu pa la producción propia d'espeutáculos.

VII.- DEFENDEMOS UN MODELU DE FINANCIACIÓN MUNICIPAL NUN BASÁU NES PLUSVALÍES URBANÍSTIQUES, SINÓN NUNA FISCALIDÁ PROGRESIVA, QUE COMBATA LES BOLSES DE FRAUDE FISCAL, Y QUE AYUDE A UNA MEYOR DISTRIBUCIÓN DE LA RIQUEZA.

• Vamos lluchar por un cambéu de la Llei de Faciendes Locales, redistribuyendo en favor de los Conceyos los ingresos de les Alministraciones Públiques. La CUPX sabe que les polítiques más cercanes a les persones y los sos problemes se desendolquen nel ámbitu municipal. Por ello, queremos que se modifique la distribución de los ingresos estatales pa beneficiar a los Conceyos, primer instancia de l'alministración pública.

• Vamos vixilar el cobru del IBI y el IAE pa evitar el fraude fiscal. Queremos que'l Ayuntamientu s'implique en garantizar que nenguna empresa nin particular safe les sos responsabilidaes en materia fiscal.

• Vamos incluyir los cables d'alta tensión, les subestaciones eléutriques y les antenes de telefonía nel Impuestu d'Actividaes Económiques (IAE), instalaciones que xeneren actividá económica y que en dellos casos son perxudiciales pa les persones que viven nel so entorniu y qu'agora nun paguen impuestos. Los enormes ingresos de les empreses eléutriques y de telecomunicaciones tienen de ser gravados de manera xusta, por que se beneficie tola ciudadanía.

• Vamos desaniciar la xestión privada de la zona azul p'aparcamientu, regulando un preciu razonable, pa que los ingresos vaigan a les arques municipales.

• Vamos desendolcar midíes series pa combatir la economía somorguiada.

VIII.- QUEREMOS QUE XIXON SÍA UNA CIUDÁ Al EMPAR QU'INDUSTRIAL, ONDE SE RESPETE EL MEDIU RURAL, Y ONDE S'APUESTE POR UN SEUTOR SERVICIOS CALIDABLE, CAPAZ DE COMBATIR EL PARU Y GARANTIZAR A TOU CIUDADANU Y CIUDADANA UNA PRESTACIÓN ECONOMICA BÁSICA PA NUN VIVIR NA PROBEZA.

•  Vamos ellaborar un Plan de Renta Básica, que permita, cola collaboración d'otres alministraciones, que nun esista nengún paráu en Xixón ensin una prestación social indefinida equivalente a lo menos al 75 % del Salariu Mínimu Interprofesional (641,50 - 481, 60) por unidá de convivencia.

• Vamos desendolcar una recuperación de la nuesa “soberanía alimentaria”, sofitando al campesináu del conceyu y la so torna a la producción de los alimentos de temporada y güerta tradicional, apostando por una agricultura ecolóxica.

•   Vamos fomentar el Cooperativismu y l'empléu rural con:
  
  - Cooperatives de producción agrícola con métodos tradicionales de la Güerta Asturiana y productos de temporada.
  - Cesión de tierres, asesoramientu técnicu y agrícola.
  - Cooperatives de cría y reproducción de pequeños animales pal consumu: pites pa güevos; pollos; coneyos,... Siempres en réxime de “semilibertá” y non estabulaos, apostando poles especies autóctones.

• Vamos fomentar el pequenu comerciu de prosimidá distribuidor d'esos productos o asemeyaos, collaborando cola Asc. Comerciantes de Xixón.

• Vamos establecer un mercáu pa la Güerta del Conceyu y los productos de Cooperatives y de Comerciu Xustu.

• Vamos promocionar cooperatives de consumu en cada barriu que prioricen los productos y artículos de les cooperatives de producción agrícola del conceyu y otros productos asturianos y onde se zarrara'l pasu a los artículos producíos con criterios “desechables”, al traviés de la cesión o arriendu por parte del Aytu de llocales dende los que llevales a efeutu.

• Vamos frenar los desahucios y garantizar una vivienda digna:
  
  - Establecer un protocolu negociador pa los casos d'impagu de les hipoteques, col fin de paralizar los desahucios.
  - Plantegar la obligación a les entidaes financieres (Bancos y Caxes) de comunicar al Ayuntamientu los impagos y posible execución (enantes de dir al Xulgáu) del desahuciu y ver posibles soluciones, pudiendo axustase'l pagu d'un arriendu transitoriu que nun supere'l 20 % de los ingresos familiares.
  - Pa families ensin ingresos y en franca probeza crear una bolsa de “arriendu-antidesahucios”  proveniente d'un fondu solidariu creáu con un impuestu a les industries altamente contaminantes.

• Vamos crear un parque de viviendes n'arriendu:
  
  - Les cases nes que s'executaron los desahucios nel Conceyu de Xixón (hasta'l momentu) por impagu d'hipoteques en Cajastur, y por tantu de la so propiedá, deben de constituyir un Parque de Viviendes n'arriendu a disposición de los ciudadanos/es.

IX.- XIXÓN TIEN QUE SER UNA CIUDÁ D'INTEGRACIÓN, MULTICULTURAL Y MULTIRRACIAL, ONDE NUN TENGAN CABIDA NIN EL RACISMU NIN LA XENOFOBIA.

• Asistencia social por parte de los servicios sociales del Ayuntamientu, de manera que les sos necesidaes básiques sían cubiertes.

• Sofitu alministrativu y asesoramientu llegal pa la realización de los diversos trámites qu'esta población vese obligada a realizar permanentemente.

• Especial atención a les necesidaes de los/es fíos/es d'inmigrantes, desendolcando programes de sofitu escolar p'aquellos coleutivos con dificultaes específiques (idiomátiques, culturales…).

• Puesta en marcha de planes d'empléu municipal qu'acuten un porcentaxe pa la participación de persones inmigrantes con dificultaes especiales.

• Fomentar la participación política de la población inmigrante al traviés de l'articulación d'espacios de diálogu colos coleutivos entamaos.

• Realizar cursos de formación y sensibilización cola Policía Municipal de Xixón sobre les característiques y problemática de la población inmigrante, promoviendo un enfoque integrador na acción d'esta institución.

•  Primir a l'alministración central p'ampliar les nacionalidaes con derechu a votu nes elecciones municipales y autonómiques.

• Crear una rede de conceyos pola integración que trabaye pol derechu de los inmigrantes a participar como eleutores pasivos y activos nes elecciones xenerales.

• Exercitar el derechu al sufraxu pa los/es emigrantes con dos años d'empadronamientu. Asina mesmu, vamos impulsar dende'l Ayuntamientu, al traviés de los foros políticos pertinentes (Fed. De Conceyos, etc.) y de presiones a l’Alministración Central, qu'esa participación de sufraxu pasivu y activu pa los inmigrantes, pueda llevase a efeutu con asemeyaos criterios tantu nes elecciones autonómiques como estatales.

Nun queremos dir al Ayuntamientu a xestionar l'actual realidá de paru y probeza. Vamos al Ayuntamientu pa tresformar la realidá redistribuyendo el trabayu y la riqueza.

Share Link: