Nov
01
2013
Conceyu Abiertu por Noreña celebra la Declaración de la Sidra como bébora oficial de Noreña. PDF Imprimir Correo electrónico
Escrito por Conceyu Abiertu por Noreña   

Conceyu Abiertu destaca la importancia simbólica y praútica d’esta declaración istitucional ya que per un llau pon en valor un rasgu fundamental de la cultura asturiana, permitiendo avalar el reconocimientu de la cultura la sidra como Patrimoniu Inmaterial de la Humanidá por parte la UNESCO asina como na praútica, el Conceyu Noreña comprométese a collaborar y promocionar la cultura la sidra y a emplegala naquellos actos istitucionales y protocolarios nos que se vayan a sirvir bébores.

Conceyu Abiertu trabayamos pola defensa’l patrimoniu cultural asturianu nos sos diversos ámbitos, coscientes de qu’ensin arraigu, ensin cohesión social, identidá coleutiva y memoria hestórica nun seremos a ser más que marionetes del capitalismu.

Nesti sen, venimos interesándonos va tiempu pola campaña de reconocimientu y puesta en valor de la sidra que pretende algamar el reconocimientu de la Cultura la Sidra como Patrimoniu Cultural Inmaterial de la Humanidá, y tamién siguimos con atención los recientes estudios publicaos sobre La Sidra en Noreña, lo que mos permitió una meyor contestualización de la propuesta na realidá noreñesa, y aprovechar pa rescatar de la hestoria de Noreña'l so pasáu como conceyu productor de sidra. Y ye que tiense costatación d’haber más d’once llagares furrulando a la vez nel Conceyu y tuvo produciéndose sidra fasta l’añu 1995, nel llagar de Ramón Alonso.

Por tou ello prestamos enforma poder esfrutar y compartir como un triunfu de toes y toos la Declaración de la sidra bébora oficial de Noreña, ya que foi una propuesta consensuá ente los distintos grupos que teníamos presentaes propuestes nesta llínea (PP y Conceyu Abiertu) xunto cola propuesta del Gobiernu Municipal, y amás fue aprobada por unanimidá y pudo ser redactada y presentada de forma billingüe, n’asturianu y castellanu, fechu esti que si bien debería ser dalgo normal, nel Conceyu de Noreña casi se pue considerar como más sorprendente y noticiable que'lpropiu fechu d’aprobar la declaración.

Aún y asina paeznos un pasu importante'l que se comprienda la íntima rellación esistente ente llingua asturiana y la cultura la sidra que formen parte d'un tou que pue nomase cultura asturiana y tamién mos paez bien que s’aproveche como argumentu de reafirmación del fechu diferencial y de les peculiaridaes que caltién la cultura asturiana de la sidra. Agora bien, el nuesu enfotu ye y siguirá siendo facer comprender que'lcompromisu cola normalización y cola promoción del asturianu nel Conceyu de Noreña nun seya namás ocasional o testimonial, en díes especiales… Nós, entendemos que la promoción y normalización ye dalgo que debe y pue incorporase al díi a díi, a lo cotidiano y que son oxetivos que se puen trabayar trasversalmente a toles demás coses, y la clave vese que ye tener voluntá político.

 

Share Link: Share Link: Bookmark Google Yahoo MyWeb Del.icio.us Digg Facebook Myspace Reddit Ma.gnolia Technorati Stumble Upon Blogmarks
Comentarios
Buscar
¡Sólo los usuarios registrados pueden escribir comentarios!

3.26 Copyright (C) 2008 Compojoom.com / Copyright (C) 2007 Alain Georgette / Copyright (C) 2006 Frantisek Hliva. All rights reserved."

 
Banner
Grupos de Google
Soscribise a Conceyu Abiertu por Noreña
Corréu ellectrónicu:
Consultar esti grupu
Banner