Sep
17
2013
Pando, Riañu y Barros ensín tresporte escolar pa neños y neñes. PDF Imprimir Correo electrónico
Escrito por Conceyu Abiertu por Llangréu   

Estos díes salió una noticia a la lluz vergoñosa dende tolos puntos de vista. La Conseyería d'Educación decidió retirar los servicios gratuitos de tresporte público a los escolinos d'estes llocalidaes llangreanes, col eternu argumentu de que “nun hai dineru”. Asina pues, los servicios de tresporte escolar de los que disponíen los neños y les neñes d'estos pueblos van ser esborriaos del mapa pol Gobiernu'l Principáu.

Dende Conceyu Abiertu por Llangréu queremos denunciar públicamente l'actitú y el proceder de la Conseyería d'Educación quitando esti importante serviciu. El Principáu abandona a la so suerte a munches decenes de guah.es d'estos pueblos, teniendo agora serios problemes p'acudir al so centru escolar, siendo la situación especialmente precaria en pueblos como Pando, onde nun coincide nin hai un sistema de tresporte públicu afayaizu pa estos escolinos.

Dende la plataforma municipalista atalantamos que ye inxustificable esta decisión política, el PSOE asturianu nun apara de recortar n'Educación, castigando nesti casu a neños y neñes de zones de Llangréu yá abandonaes y escaecíes polos poderes públicos de por sí. Asina, entendemos qu'esta decisión supón un grave impautu pa les families y los propios estudiantes. Fomenta'l fracasu escolar y la desmotivación haza los estudios d'estos neños, al ver dende pequeños que too son dificultaes a la hora d'estudiar dignamente. Per otru llau, munches families ven como quiciabes tean d'arrenunciar a un puestu de trabayu a colación d'esti problema, lo que supón afondar na progresiva crisis y miseria que tamos viviendo nesti conceyu.

Asina pues, dende Conceyu Abiertu por Llangréu llamamos a padres, madres y neños y neñes a movilizase pa recuperar esti serviciu y puxar por una escuela digna, y non dependiente a los intereses del capital, la rede clientelar del PSOE y demás cáncanos d'Asturies. Per otru llau, desiximos a María Fernández, alcaldesa d'esti conceyu, más presión al gobiernu autonómicu y que nun mire pa otru llau como hasta agora. Queremos que los escolinos de Barros, Pando y Riañu tean un serviciu de tresporte escolar dignu y de baldre, como hasta agora.
Share Link: Share Link: Bookmark Google Yahoo MyWeb Del.icio.us Digg Facebook Myspace Reddit Ma.gnolia Technorati Stumble Upon Blogmarks
Comentarios
Buscar
¡Sólo los usuarios registrados pueden escribir comentarios!

3.26 Copyright (C) 2008 Compojoom.com / Copyright (C) 2007 Alain Georgette / Copyright (C) 2006 Frantisek Hliva. All rights reserved."

 
Banner