Mar
16
2013
Por una carretera digna pa la parroquia de Santa Bárbola PDF Imprimir Correo electrónico
Escrito por Adrian   

 

 

Dende Conceyu Abiertu por Samartín queremos denunciar la llaceriosa situación na que s´alcuentra la carretera de Santa Bárbola, AS 337, a l’altura del kilómetru 4. Dende fai ya más d´un añu y por mor de les lluvias, prodúxose un argayu al pie la carretera na que´l tarrén sufrió un desplazamiento cola consecuente formación de resquiebres y fundimientu de la mitá del anchu de la carretera y finques de la rodiada. Les resquiebres en cuestión cada vegada se faen mayores y per elles fíltrase l´agua de la lluvia faciendo cada vegada más inestable la calzada.

Queremos quexamos tamién del abandonu y despreocupación qu’amuesa l´Alministración municipal, que nun atiende a les necesidades y problemes de los pueblos del mediu rural del conceyu, y, tamién y al mesmu tiempo, de l´Alministración del Principáu, por ser ellos los encargaos de la xestión d´esta carretera y que, lo único que fixeron dellos meses dempués de que se produxere l´incidente, fue poner una señal de tráficu qu´indica la presencia d´un badén y, fai poco, parchiar el fundimientu de mala manera con una ruina capa de brea.

Ante tales circunstancies, son constantes les quexes de les vecines y vecinos qu´usen a diariu esta carretera y que ven pelligrar l´únicu accesu per carretera, per esta vertiente del conceyu de Samartín, a los pueblos, finques y montes asitiaos dende´l kilómetru 4 en adelantre.

Los vecinos del pueblu y de la collación de Santa Bárbola aniciaron fai un mes una campaña de recoyida de firmes pa que s’igüe la situación de la carretera y pa intentar que se escuche la voz de los ciudadanos, y el pasáu día 12 de marzu, entregaron a la Conseyería del Principáu d´Asturies competente nel asuntu, un total de 511 firmes esixendo soluciones inmediates al problema.

Dende Conceyu Abiertu por Samartín sofitamos estes protestes y animamos a la vecindá del conceyu de Samartín a trabayar al traviés d´iniciatives populares como esta pa facer presión y ser quien a igüar toes aquelles cuestiones que dende les Alministraciones nun atienden.

La iniciativa popular ye´l camín p´acabar col desdexamientu y la incompetencia d´aquellos xestores que gobiernen los nuesos pueblos.

Share Link: Share Link: Bookmark Google Yahoo MyWeb Del.icio.us Digg Facebook Myspace Reddit Ma.gnolia Technorati Stumble Upon Blogmarks
Comentarios
Buscar
¡Sólo los usuarios registrados pueden escribir comentarios!

3.26 Copyright (C) 2008 Compojoom.com / Copyright (C) 2007 Alain Georgette / Copyright (C) 2006 Frantisek Hliva. All rights reserved."