Nov
03
2012
Conceyu Abiertu por Uviéu considera vergoñoses les obres del vial de la “Y” en Ventanielles PDF Imprimir Correo electrónico
Escrito por Adrian   

 

 

Dende va pocos díes entamaron les obres pa la construcción d’un accesu de l’autopista “Y” nel barriu de Ventanielles, qu’afeuta en concretu a les casi Ríu Navia, Ríu Nalón y Ríu Pigüeña. Esta obra, en primer llugar, hai que denunciar que lleva siendo refugada frontalmente polos vecinos y vecines dende que se conoció el proyeutu.

El coleutivu vecinal afeutáu organizó iniciatives como una recoyida de firmes, xunto cola que presentaron un escritu pidiendo falar col alcalde. Esta petición fízose en delles ocasiones, ensin nengún tipu de rempuesta. L’Ayuntamientu, simplemente, ignoró a los vecinos y vecines, que protesten con tola razón.

A ello hai qu’amestar les mentires sobre les característiques del proyeutu, que si yá d’entrada paecía absolutamente xabaz, col entamu de les obres ye simplemente inconcebible cómo se puede llevar a cabu tal obra. En principiu, el nuevu accesu de l’autopìsta diba a pasar a ocho metros, cifra que yá ye escasa dafechu, pero la realidá ye que col entamu de los trabayos la distancia con ún de los edificios afeutaos nun llega nin a los dos metros.

Esto, como ye lóxico, fae que los y les vecines tengan l’autopista práuticamente metía en casa, fechu que se suma a que la vía en sí yá pasa averada a los bloques d’edificios y facía la convivencia difícil por culpa de los ruíos constantes que la “Y” xenera. Pues por si había pocos perxuicios, agora les intituciones públiques amesten más.

Pa Conceyu Abiertu por Uviéu ye inesplicable cómo se puede executar la obra neses condiciones, con un tratu absolutamente dictatorial d’un Ayuntamientu qu’ignoró a los vecinos y vecines, asina como’l so bientar. Esto ye una consecuencia más de la falta de democracia nel conceyu, onde unes élites deciden pol pueblu pero ensin el pueblu.

Qu’un accesu d’una autopista pase a malapenes dos metros d’un bloque d’edificios nel nuesu conceyu nun tien nengún tipu de xustificación, y ye que consideramos non sólo qu’hai qu’aparar esta obra, sinon qu’hai que tomar midíes que frenen la contaminación acústica que yá sufren de por sí los y les vecines. Eso ye lo que fadría un Ayuntamientu esmolecíu por los y les ciudadanes, pero nun ye esti el casu.

Tamién queremos denunciar una vegada más el maltratu y escaezu del Ayuntamientu pa colos barrios y zones rurales del nuesu conceyu. Demientres vimos en díes pasaos cómo la Casa Conceyu movilizaba a decenes d’operarios acondicionando y engalanando’l centru la ciudá pa la cellebración de los elitistes Premios Príncipe, agora vemos la otra cara, la de les deficiencies nos barrios periféricos, y la nula sensibilidá institucional haza les peticiones de los y les vecines.

Por too ello, dende Conceyu Abiertu por Uviéu desiximos la inmediata paralización de les obres tal y como se tan desendolcando, y consideramos imprescindible que l’Ayuntamientu escuche y faiga casu a los y les afeutaes, que tienen tola razón nes sos vindicaciones y colos que mos solidarizamos dafechu.

Share Link: Share Link: Bookmark Google Yahoo MyWeb Del.icio.us Digg Facebook Myspace Reddit Ma.gnolia Technorati Stumble Upon Blogmarks
Comentarios
Buscar
¡Sólo los usuarios registrados pueden escribir comentarios!

3.26 Copyright (C) 2008 Compojoom.com / Copyright (C) 2007 Alain Georgette / Copyright (C) 2006 Frantisek Hliva. All rights reserved."