Conceyu Abiertu

Nomamos precisamente al nuesu proyeutu como CONCEYU ABIERTU pa vindicar esta institución de la tradición comuñal asturiana como una ferramienta coleutiva que nel momentu presente tien que sirvir pa sumar voluntaes y que, nel futuru, tendrá de ser el pilpayu d'una Democracia participativa n’Asturies.

Les persones qu’integramos CONCEYU ABIERTU vamos trabayar pa desbloquiar l'actual situación promoviendo nueves dinámiques d'organización y aición dende la izquierda soberanista. Nesi sen, apostamos pol municipalismu participativu como garantía d'una democracia plena y del control popular de la xestión institucional.

Dende CONCEYU ABIERTU manifestamos que:

1º- La situación de crisis social, económica, identitaria y política que vivimos n’Asturies ye tan grave que resulta imprescindible que toos y toes faigamos un esfuerzu pa superar la dixebra y la desmovilización esistentes.

2º- Hai una clase política apoltronada que cola so xestión corrupta y clientelar (PSOE, IU y PP) subordina los intereses coleutivos a los sos oxetivos particulares. Desiximos un cambiu n’Asturies qu’ha tar protagonizáu necesariamente pol conxuntu de les clases populares.

3º- El paru, la emigración forciada de milenta asturianos cada añu,  l’emprobecimientu y la frustración del pueblu tán direutamente provocaos pola destruición de los seutores productivos de la nuesa economía como consecuencia de polítiques planificaes dende fuera d’Asturies. Ye preciso entós entamar un procesu de cambiu estructural col enfotu d’algamar un modelu sociu-económicu ecolóxicamente caltenible, productivu daveres, autocentráu na realidá especifica d’Asturies y al serviciu de los intereses de la mayoría social.

4º- La ñegación y desaniciu de los elementos culturales que configuren la nuesa identidá como nación hestórica y la non oficialidá de la llingua asturiana son la preba del desdeñu al que nos tienen sometíos los nuesos gobernantes, cola única fin de que nos avergoñemos de lo que somos. Dende CONCEYU ABIERTU caltenemos qu’un pueblu ensin autoestima, ye un pueblu ensin voz nin futuru.

5º- Ye perimportante desendolcar un procesu de rearticulación coleutiva dende los conceyos afitando un proyeutu d’anovamientu políticu n’Asturies per aciu de la creación d’una basa social que lu pueda sostener nel tiempu.

6º- Les constantes agresiones al entornu natural (sobreesplotación del territoriu, contaminación, especulación urbanística, usu d'elementos cancaniegos, política de cementu…) fai que seya necesario implicase activamente na defensa ecolóxica del nuesu territoriu, lluchando pola recuperanza del mediu ambiente y diendo a la escontra dafechu de cualesquier sistema productivu sofitáu na esplotación irracional de la ñatura, del xorrecimientu cuantitativu de la produición col únicu finxu d’atropar beneficios económicos y del fomentu del consumu escomanáu. Puxaremos poles tribes de trabayu y produición sofitaes nel respetu de los valores naturales y paisaxísticos, na renovabilidá de los recursos naturales y nel caltenimientu de la calidá de vida como padremuñu a tresmitir a les futures xeneraciones.

El movimientu ciudadanu CONCEYU ABIERTU, naguando pola ellaboración dende abaxo de nueves metodoloxíes, dinámiques y ferramientes polítiques a curtiu  y llargu plazu, escueye l’encadarmase como una rede de plataformes asamblearies d'ámbitu llocal

Share Link: