Oct
09
2012
Conceyu Abiertu por Villaviciosa ante los permisos concedíos pa los sondeos d’investigación d’hidrocarburos Viñón-1, Cuélebre-1 y Cuélebre-2 PDF Imprimir Correo electrónico
Escrito por Adrian   

La empresa Petroleum Oil & Gas Espana S. A. (del Grupu Gas Natural Fenosa) vien d’obtener nel pasáu mes d’agostu un nuevu permisu pa realizar sondeos d’investigación pa evaluar el potencial en hidrocarburos de la zona oriental d’Asturies. Pa ello, planteen la estracción del gas non convencional mediante la teúnica de la francedura hidraúlica también conocía por “fracking”.

El gas convencional o natural atópase de manera normal formando bolses  en roques poroses y permeables a muncha presión,  pa estraelu simplemente hai que perforar hasta algamar la bolsa, de mou que cuando esta se trespasa’l gas fluye hacia arriba gracies a la diferencia de presión.  En cambiu, el gas non convencional atópase n’estratos a muncha profundidad,  ocupando espacios porosos ensin conexión entre ellos y en roques que presenten una permeabilidá estremadamente baxa. Tolos depósitos non convencionales tienen en común dalgo: el conteníu n’hidrocarburos por volumen de roca resulta reducíu en comparación colos yacimientos convencionales, tan dispersos nuna gran superficie de miles de kilómetros cuadrados y presenten una permeabilidá mui baxa. Poro, la so estracción requier métodos especiales, nesti casu la francedura hidraúlica, una teúnica especialmente agresiva pol impautu mediuambiental qu’ocasiona.

En resume, la teúnica consiste en realizar una perforación vertical hasta algamar la capa del estratu, a continuación, efectuase una perforación horizontal al traviés della. Dempués, incorpórense esplosivos pa provocar pequeñes francedures ya inyéctense miles de tonelaes d’agua a muncha presión, xunto con arena y aditivos químicos tóxicos (onde la mayoría les vegades se desconoz el conteníu exautu d’estos químicos, ente los aditivos químicos que s’empleguen atópense benzenos, xilenos o cianuros, hasta llegar a unas 500 sustancias químicas, munches d’elles cancerígenes, mutagénas, y con otres propiedaes mui emolecedores). Esti agua a presión france la roca lliberando’l gas que llueu, xunto col agua, l’arena y los aditivos tornen a la superficie. Cabe destacar qu’enxamás tornará la totalidá del fluyíu, siempres se produz una pérdida importante que pue rondar el 5-20 % que s’infiltra nel subsuelo coles consiguientes consecuencies mediuambientales.

Entre la multitú d’impautos que xenera l’usu d’esti tipu de teúniques cabría destacar:

 L’usu de grandes superficies del tarrén pa les plataformes de perforación, zones d'aparcamientu y maniobra pa camiones, equipos, instalaciones de procesamientu y tresporte de gas, asina como les carreteres y viales d'accesu. Emisiones atmosfériques de contaminantes, contaminación d'agües soterrañes por cuenta de los fluxos incontrolaos de fluyíos causaos por erupciones o derrames, la fuga de fluyíos de fracturación y l'arramáu incontroláu d'agües residuales. Los fluyíos de fracturación contienen sustances peligroses y el so refluxu contien amás metales pesaos y materiales radiactivos procedentes del depósitu.

Les esperiencies llograes nos Estaos Xuníos (únicu sitiu onde s’emplega esta teúnica) amuesen que se producen numberosos accidentes, que pueden estropiar non sólo’l mediu ambiente si non tamién la salú humana. Cerca de los pozos de gas rexistróse contaminación d'agües soterrañes con metanu, qu'en casos estremos pueden provocar la esplosión d'edificios residenciales, asina comu cloruru de potasiu, que provoca la salinización del agua potable.

Dende Conceyu Abiertu por Villaviciosa queremos refugar esti tipu de proyeutos enmarcaos dientru la política mediuambiental y enerxética seguida pol gobiernu asturianu, onde s’apuesta por proyeutos dafechu innecesarios, mui agresivos col entornu, que nun xeneren puestos d’empléu real y que nun repecurten positivamente de mou dalgún na sociedá asturiano si non nos intereses d’empreses privaes. Asturies ye un País escedentariu enerxéticamente falando, la capacidá pa producir enerxía cola que cuntamos ye mui superior a la del consumu, de manera qu’esto permite especular col escedente enerxéticu. Polo tanto, nun ta xustificao la investigación de nueves formes d’esplotación enerxética cuando non hai una demanda real si non que respuende cenciellamente a los intereses d’empreses p’algamar un beneficiu económicu.

Dende Conceyu Abiertu por Villaviciosa apostamos por un modelu enerxéticu caltenible, onde tengan un papel prioritario l’aforru, la eficiencia enerxética y la optimización de los procesos.

Share Link: Share Link: Bookmark Google Yahoo MyWeb Del.icio.us Digg Facebook Myspace Reddit Ma.gnolia Technorati Stumble Upon Blogmarks
Comentarios
Buscar
¡Sólo los usuarios registrados pueden escribir comentarios!

3.26 Copyright (C) 2008 Compojoom.com / Copyright (C) 2007 Alain Georgette / Copyright (C) 2006 Frantisek Hliva. All rights reserved."

 
Banner