Dec
23
2013
Ponencia base sobre les eleiciones europees Mayu 2014 PDF Imprimir Correo electrónico

Ponencia base pal discutiniu nel Conceyu Nacional del 28 de payares en Noreña de l'aición de Conceyu Abiertu de cara a les eleiciones europees de Mayu 2014.

1. Les organizaciones polítiques del soberanismu asturianu d'izquierdes venimos encariando dende va meses un nueva dinámica na que se vienen dando  pasos importantes nel camín de la xunidá d'aición empobináu al traviés del trabayu conxuntu en distintes convocatories, propies y ayenes (Primeru Mayu, 25 Mayu, 8 Setiembre, declaración asturiana de sofitu al derechu a decidir de Catalunya asina como dalguna iniciativa conxunta en conceyos como Xixón).

2. Esta xunidá d'aición carauterízase por aniciase n'ausencia de procesos elleutorales lo cualo valoramos positivamente pero ensin que seya denguna torga p’asumir la importancia que pudiere tener a lo postrero que s'afite tamién nun posible escenariu elleutoral.

3. Nesi sen, Conceyu Abiertu apuesta pola continuidá y afondamientu  nesta dinámica, siempres afitando unos puntos básicos como imprescindibles pa encadarmar un discursu asturianu, en clave nacional, d'izquierda, popular, y con base nos conceyos. 

4. Por mor de la nomada globalización munches polítiques son diseñaes lloñe d'Asturies nel ámbetu del capitalismu global asina como nel ambetu européu y estatal. El fechu de ser una organización predominantemente conceyil y asturiana nun ye torga pa que defendamos ya espardamos posicionamientos ideolóxicos que van más alló del ámbetu del conceyu o d'Asturies.  Somos conscientes que dende lo local facemos una llucha global contra’l capitalismu y el imperialismu.

5. Nesi sen,  dende'l conxuntu de la  izquierda  asturiana vien denunciándose l'esmantelamientu que carez Asturies, principalmente dende la denomanda reconversión industrial. Nesti procesu de desmantelamientu de los seutores económicos tradicionales n'Asturies ye clave'l papel de la Xunión Europea  xunta'l Reinu d'España fomentando tou tipu de polítiques que supunxeron l'esfarrape de los seutores económicos asturianos pal beneficiu de les élites económiques.

6. Poro, dende Conceyu Abiertu valoramos que ye esti un puntu común de coincidencia nel que poder encadarmar un discursu de crítica haza les instituciones que somorguien a Asturies, y esparder los valores de la democracia real y de la soberanía popular dientru d'una Europa de los pueblos.

7. Ye por ello que'l papel de Conceyu Abiertu énte les elleiciones al parlamentu européu en mayu de 2014 debe ser necesariamente activu.

8. Pero queremos perafitar qu' esti fechu debe tar ineludiblemente acompangáu de l’aición conxunta del soberanismu asturianu y de coleutivos d’otros ámbitos de la izquierda asturiana axuntándonos con un papel activu non eleutoralista y de crítica radical a la Xunión Europea.

9. Nesa llinia, afitamos que Conceyu Abiertu nun se presentará en solitario a los comicios europeos de mayu de 2014.

10. Proponemos dos vies posibles por esti orde de preferencia: 

10.1 Puxar por una campaña xunitaria ente organizaciones politiques y movimientos sociales a la escontra la europa del capital, denunciando lo que ye la XE y lo que supón p'Asturies. En definitiva, facer la campaña del "NON a la Europa del capital", "NON a la Troika", "NON  a los retayos", "NON  a la Europa del patriarcáu", "NON  a la Europa qu'arruinó a Asturies", etc. O el mesmu planteamientu  en positivo “VOTO por...” “VOTO por una Europa de pueblos llibres”, etc.

10.1.1. Dende esti puntu básicu, consideramos que'l trabayu activu que se faiga al respeutu d'esta cuestión tien que ser dende la base y a pie de cai, siguiendo la filosofía de trabayu que defendemos dende Conceyu Abiertu. Asina, ye clave trabayar nos conceyos, averando al pueblu asturianu los nuesos posicionamientos del "NON a la Troika", y sobre too los sos "por qués" dende una perspeutiva asturiana y d'izquierda tresformadora.

10.1.2. Una espresión práutica d'esta propuesta podría ser el repartu de papeletes con un diseñu pidiendo'l NON, guetando pa ello un llema afayaízu y atractivu, o distintes razones qu'escoyamos como exes del discursu. Por exemplu “Voto NON a la  XE…porque quiero una Asturies Llibre” o “Voto NON a la XE…porque toi  escontra’l fracking” o “Voto NON a la XE…porque quiero qu l’asturianu  seya oficial”. Too esto acompañao d’una llarga campaña informativa con  charres, cartelería, actos na cai, etc. A los actos intentaría traese personaxes de fuera d’Asturies de la izquierda catalana, vasca, andaluza y de fuera del Estáu.

10.1.3 En definitiva, la campaña debería xirar al traviés d'estos dos exes básicos:

-Exe práuticu: Trabayu na cai (Visibilización)

-Exe teóricu: Divulgación (Trabayar a fondu les razones y esponeles de forma cenciella, pa una aplicación efeutiva nel trabayu de cai)

10.1.4. Poro, trabayando alrodiu de mensaxes cenciellos, nidios y bien argumentaos podremos tamién facer llabor a comuña con toes aquelles organizaciones, coleutivos y persones que coincidan nos nuesos posicionamientos (organizaciones polítiques, estudiantiles, de mocedá, centros autoxestionaos, movimientos sociales, sindicatos, etc) aplicando asina la idega de la xunidá d'aición cola ventaxa de que  ye dalgo factible dende un puntu de vista teóricu, puesto que los plantegamientos xenerales pueden ser aceutaos por un ampliu espectru de la izquierda alternativa asturiana. 

10.2 Aperiar dalguna formula afayaiza que nos permita participar na coalición encadarmada dende EH Bildu cola coindición de que la participación na candidatura dende Asturies seya xunitaria y ampliamente representativa de la izquierda soberanista asturiana y col mesmu discursu críticu escontra la XE y les sos instituciones de gobiernu qu’el plantegáu anteriormente.

10.2.1 Nesti supuestu afitamos como socios preferibles na coalición a les izquierdes soberanistes más asemeyaes a los plateamientos estratéxicos de Conceyu Abiertu (SORTU, CUP) y refugando a aquelles organizaciones que nos sos planteamientos ideolóxicos o  prauticos s’alloñen de nós. (ERC, BNG).

11. Pa rematar, esclariar qu’esti documentu recueye unes pautes o llinies orientatives y que estes orientaciones asoleyaes nesti Conceyu Nacional son suficientes pa encariar esti procesu eleutoral a lo menos con dellos finxos mínimos claros sobro qué ye lo que queremos y en qué podemos entamar a trabayar de magar esti intre pero nun cabe duda que entá queda tiempu pa la celebración de les elecciones, qu’hai variables qu’entá nun controlamos y que podrien afeutar al desendolcu de los acontecimientos poro ye evidente qu’el alderique nun termina equí y que podrá siguir asocediendose nos aconceyamientos ordinarios de la Coordinadora Nacional.

Avientu de 2013.

CONCEYU ABIERTU

Share Link: Share Link: Bookmark Google Yahoo MyWeb Del.icio.us Digg Facebook Myspace Reddit Ma.gnolia Technorati Stumble Upon Blogmarks
Comentarios
Buscar
¡Sólo los usuarios registrados pueden escribir comentarios!

3.26 Copyright (C) 2008 Compojoom.com / Copyright (C) 2007 Alain Georgette / Copyright (C) 2006 Frantisek Hliva. All rights reserved."

 

CONCEYU ABIERTU POR

  

SÍGUINOS TAMIÉN EN